ఒక ఊరి కోసం చరణ్ పోరాటం.. ‘పెద్ది’ కథలో అసలు ట్విస్ట్ ఇదేనా?

మెగా పవర్ స్టార్ రామ్ చరణ్ హీరోగా, ‘ఉప్పెన’ దర్శకుడు బుచ్చిబాబు సానా తెరకెక్కిస్తున్న భారీ చిత్రం ‘పెద్ది’పై రోజురోజుకూ అంచనాలు పెరుగుతున్నాయి. సినిమా అనౌన్స్ అయినప్పటి నుంచే ఈ మూవీపై భారీ హైప్ నెలకొంది. ముఖ్యంగా రామ్ చరణ్‌ను పూర్తిగా కొత్త గెటప్‌లో, గ్రామీణ నేపథ్యంలో చూపించబోతుండటంతో అభిమానుల్లో ఆసక్తి మరింత పెరిగింది. ప్రస్తుతం షూటింగ్ పూర్తి చేసుకున్న ఈ చిత్రం పోస్ట్ ప్రొడక్షన్ పనులను వేగంగా పూర్తి చేసుకుంటోంది.

ఇప్పటికే విడుదలైన పోస్టర్లు, టీజర్ గ్లింప్స్, పాటలు సినిమాపై అంచనాలను మరింత పెంచేశాయి. ముఖ్యంగా ఏఆర్ రెహమాన్ అందించిన సంగీతం సోషల్ మీడియాలో వైరల్ అవుతోంది. ‘చికిరి చికిరి’, ‘రై రై రా రా’ వంటి పాటలు గ్రామీణ ఫోక్ టచ్‌తో ప్రేక్షకులను ఆకట్టుకున్నాయి. రత్నవేలు సినిమాటోగ్రఫీ కూడా ఈ చిత్రానికి ప్రత్యేక ఆకర్షణగా నిలవనుందని సినీ వర్గాలు చెబుతున్నాయి.

అయితే ఇప్పుడు సోషల్ మీడియాలో ‘పెద్ది’ కథ ఇదేనంటూ ఒక స్టోరీ లైన్ వైరల్ అవుతోంది. అదే ఇప్పుడు సినీ అభిమానుల మధ్య హాట్ టాపిక్‌గా మారింది. ప్రచారం జరుగుతున్న కథ ప్రకారం ఈ సినిమా 1980ల నాటి ఉత్తరాంధ్ర గ్రామీణ నేపథ్యంలో సాగుతుందట. ఒక చిన్న పల్లెటూరిలో రైల్వే స్టేషన్ ఉన్నప్పటికీ అక్కడ ఎలాంటి రైళ్లు ఆగవని చెబుతున్నారు. దీంతో ఆ ఊరి ప్రజలు ఏళ్ల తరబడి రవాణా సమస్యలతో ఇబ్బందులు పడుతూ ఉంటారు.

ఆ గ్రామానికి రైలు ఆగడం అనేది కేవలం ప్రయాణ సౌకర్యం మాత్రమే కాదు.. అది ఆ ఊరి గౌరవం, ఆత్మగౌరవానికి ప్రతీకగా మారుతుందని కథ చెబుతోంది. ఇలాంటి పరిస్థితుల్లో హీరో ‘పెద్ది’గా కనిపించే రామ్ చరణ్ వ్యవస్థపై పోరాటం మొదలుపెడతాడట. గ్రామ ప్రజల సమస్యలను పరిష్కరించేందుకు కుస్తీ, క్రికెట్ వంటి క్రీడలను ఆయుధాలుగా ఉపయోగించి ఎలా పోరాడాడు? చివరకు తన ఊరికి రైలు ఆపించగలిగాడా? అనే ఎమోషనల్ జర్నీతో సినిమా సాగుతుందని సోషల్ మీడియాలో ప్రచారం జరుగుతోంది.

ఈ స్టోరీ లైన్ బయటకు రావడంతో సోషల్ మీడియాలో మిశ్రమ స్పందనలు కనిపిస్తున్నాయి. కొందరు నెటిజన్లు ఈ కథ చాలా సింపుల్‌గా ఉందని కామెంట్లు చేస్తున్నారు. రామ్ చరణ్ వంటి స్టార్ హీరోతో ఇంత చిన్న పాయింట్‌పై సినిమా తీయడం రిస్క్ అని అభిప్రాయపడుతున్నారు. ముఖ్యంగా ‘ఆర్ఆర్ఆర్’ తర్వాత చరణ్ నుంచి భారీ స్థాయి కథనే ప్రేక్షకులు ఆశిస్తున్నారని చెబుతున్నారు.

మరికొందరు మాత్రం బుచ్చిబాబు కథ చెప్పే విధానంపై పూర్తి నమ్మకం వ్యక్తం చేస్తున్నారు. ‘ఉప్పెన’ సినిమాలో కూడా సింపుల్ పాయింట్‌ను ఎమోషనల్‌గా, బలమైన పాత్రలతో చూపించి భారీ హిట్ అందుకున్నాడని గుర్తు చేస్తున్నారు. అందుకే ‘పెద్ది’ విషయంలో కూడా కథ కంటే ఎమోషన్, ప్రెజెంటేషన్ ముఖ్యమని అభిమానులు చెబుతున్నారు.

ఇక ఈ సినిమాలో యాక్షన్ సీక్వెన్స్‌లు కూడా ప్రత్యేకంగా ఉండబోతున్నాయని సమాచారం. ముఖ్యంగా క్లైమాక్స్‌లో వచ్చే 20 నిమిషాలు ప్రేక్షకులను థ్రిల్‌కు గురిచేస్తాయని మూవీ టీమ్ నమ్మకంగా ఉందట. గ్రామీణ నేపథ్యంలో సాగే స్పోర్ట్స్ యాక్షన్ డ్రామాగా ఈ చిత్రం తెరకెక్కుతున్నట్లు తెలుస్తోంది.

రామ్ చరణ్ ఈ సినిమాలో చాలా రఫ్ అండ్ మాస్ లుక్‌లో కనిపించబోతున్నాడు. ఇప్పటికే విడుదలైన పోస్టర్లలో చరణ్ లుక్ అభిమానులను బాగా ఆకట్టుకుంది. పొడవాటి జుట్టు, గడ్డం, గ్రామీణ యువకుడి బాడీ లాంగ్వేజ్‌తో పూర్తిగా కొత్తగా కనిపిస్తున్నాడు. ఈ పాత్ర కోసం చరణ్ ప్రత్యేకంగా శిక్షణ కూడా తీసుకున్నట్లు సమాచారం.

ఈ సినిమాలో బాలీవుడ్ బ్యూటీ జాన్వీ కపూర్ హీరోయిన్‌గా నటిస్తోంది. అలాగే కన్నడ స్టార్ శివరాజ్‌కుమార్ కీలక పాత్రలో కనిపించనున్నారు. జగపతిబాబు, బోమన్ ఇరానీ, దివ్యేందు శర్మ వంటి ప్రముఖ నటులు కూడా ఈ చిత్రంలో ముఖ్య పాత్రలు పోషిస్తున్నారు. దీంతో సినిమాపై పాన్ ఇండియా స్థాయిలో ఆసక్తి నెలకొంది.

ఈ చిత్రాన్ని వృద్ధి సినిమాస్ మరియు మైత్రీ మూవీ మేకర్స్ సంయుక్తంగా నిర్మిస్తున్నాయి. భారీ బడ్జెట్‌తో తెరకెక్కుతున్న ఈ సినిమాను మొదట ఏప్రిల్‌లో విడుదల చేయాలని భావించారు. అయితే పోస్ట్ ప్రొడక్షన్ పనులు ఆలస్యం కావడంతో రిలీజ్‌ను వాయిదా వేశారు. ఇప్పుడు జూన్ 4న ప్రపంచవ్యాప్తంగా విడుదల చేయనున్నట్లు మేకర్స్ అధికారికంగా ప్రకటించారు.

ప్రస్తుతం మెగా అభిమానులు ఈ సినిమా కోసం ఆసక్తిగా ఎదురుచూస్తున్నారు. ‘గేమ్ చేంజర్’ తర్వాత రామ్ చరణ్ నుంచి వస్తున్న ఈ మూవీపై భారీ అంచనాలు ఉన్నాయి. సోషల్ మీడియాలో వైరల్ అవుతున్న స్టోరీ లైన్ నిజమేనా? లేక అసలు కథలో ఇంకా పెద్ద ట్విస్టులు ఉన్నాయా? అన్న ఆసక్తి ఇప్పుడు అందరిలో కనిపిస్తోంది.ఏదేమైనా ‘పెద్ది’ సినిమా విడుదలకు ముందే సోషల్ మీడియాలో భారీ చర్చకు దారి తీసింది. బుచ్చిబాబు మరోసారి మ్యాజిక్ చేస్తాడా? రామ్ చరణ్ కెరీర్‌లో ఇది మరో బ్లాక్‌బస్టర్ అవుతుందా? అన్నది ఇప్పుడు సినీ అభిమానుల్లో హాట్ టాపిక్‌గా మారింది.