విడాకులు కాదు విముక్తి: మీరట్‌లో కుమార్తెకు ఘన స్వాగతం

సామాజికంగా విడాకులను నెగటివ్‌గా చూసే పరిస్థితుల్లో, ఉత్తరప్రదేశ్‌లోని మీరట్‌లో ఒక కుటుంబం పూర్తిగా భిన్నమైన సందేశాన్ని ఇచ్చింది. మాజీ జడ్జి కుటుంబం తమ కుమార్తె ప్రణీత వశిష్ట విడాకులను బాధగా కాకుండా, కొత్త జీవితానికి ఆరంభంగా భావించి వేడుకగా జరుపుకుంది.

2018లో ఆర్మీ మేజర్‌తో వివాహం జరిగిన ప్రణీతకు పెళ్లి తర్వాత అత్తింటి వేధింపులు మొదలయ్యాయి. శారీరకంగా, మానసికంగా ఇబ్బందులు ఎదుర్కొన్న ఆమెకు కుమారుడు పుట్టిన తర్వాత కూడా పరిస్థితులు మారలేదు. దీంతో ఆమె కోర్టులో విడాకులు కోరగా, ఈ నెల 4న న్యాయస్థానం ఆమెకు విడాకులు మంజూరు చేసింది.

విడాకుల తర్వాత కోర్టు బయటకు వచ్చిన ప్రణీతను ఆమె కుటుంబ సభ్యులు మేళతాళాలతో స్వాగతించి, ఊరేగింపుగా ఇంటికి తీసుకెళ్లారు. ఇది కేవలం సంబరమే కాకుండా, ఒక మహిళకు కుటుంబం అండగా నిలబడితే ఆమె జీవితాన్ని తిరిగి నిర్మించుకోవచ్చు అనే బలమైన సందేశంగా మారింది.

“నా కూతురు సంతోషంగా లేని జీవితంలో ఉండడం కంటే, ఆమెను బయటకు తీసుకురావడం నా బాధ్యత” అని ఆమె తండ్రి తెలిపారు. ప్రణీత కూడా మహిళలకు ఒక సందేశం ఇచ్చింది — పెళ్లి ముందు ఆలోచించండి, మీపై మీకు నమ్మకం ఉండాలి, స్వతంత్రంగా ఉండాలి.