“హెల్మెట్ పెట్టుకుని నడుపుతాం”.. డ్రైవర్ షాకింగ్ సమాధానం

మార్కాపురంలో జరిగిన ఓ సంఘటన ప్రస్తుతం సోషల్ మీడియాలో వైరల్‌గా మారింది. ప్రమాదాలు పెరుగుతున్న నేపథ్యంలో కూడా కొన్ని ప్రైవేటు ట్రావెల్స్ నిర్వాహకులు నిర్లక్ష్యంగా వ్యవహరిస్తున్నారనే విమర్శలు వ్యక్తమవుతున్నాయి.

ఆదివారం రాత్రి సుమారు 9:45 గంటలకు శ్రీ లక్ష్మీ నరసింహ ప్రైవేటు ట్రావెల్స్‌కు చెందిన బస్సు మార్కాపురం నుంచి బెంగళూరుకు బయలుదేరాల్సి ఉంది. కోర్టు కూడలి వద్ద బస్సులో ఎక్కేందుకు వచ్చిన సుమారు 36 మంది ప్రయాణికులు బస్సు ముందు అద్దం పూర్తిగా పగిలిపోయి ఉందని గమనించారు. దీంతో వారు డ్రైవర్లను ప్రశ్నించారు.

అయితే డ్రైవర్లు మస్తాన్, రసూల్ నిర్లక్ష్యంగా స్పందిస్తూ “అద్దం లేకపోయినా హెల్మెట్ పెట్టుకుని బస్సు నడుపుతాం” అని అహంకారంగా చెప్పారు. ఈ వ్యాఖ్యలు ప్రయాణికుల్లో తీవ్ర ఆగ్రహాన్ని రేపాయి. వారు వెంటనే డ్రైవర్లతో వాగ్వాదానికి దిగారు.

ఇంతలో డ్రైవర్ బస్సును స్టార్ట్ చేయగా, ఇంజిన్ నుంచి అనుమానాస్పద శబ్దాలు వినిపించాయి. దీంతో ప్రయాణికులు మరింత భయాందోళనకు గురై వెంటనే స్థానిక పోలీసులకు ఫిర్యాదు చేశారు. మరో బస్సు ఏర్పాటు చేయాలని వారు డిమాండ్ చేశారు.

పోలీసులు ఘటన స్థలానికి చేరుకుని విచారణ జరపగా, ఆ బస్సుకు రెండు రోజుల క్రితమే ప్రమాదం జరిగినట్లు బయటపడింది. అయినప్పటికీ అదే బస్సును మరమ్మత్తులు చేయకుండా నడపడానికి సిద్ధం చేయడం తీవ్ర నిర్లక్ష్యంగా భావించారు.

దీంతో పోలీసులు ఆ బస్సును సీజ్ చేసి, సంబంధిత నిర్వాహకులపై చర్యలు ప్రారంభించారు. ఈ ఘటనకు సంబంధించిన వీడియో సోషల్ మీడియాలో వైరల్ అవుతూ, ప్రయాణికుల భద్రతపై మరింత కఠిన చర్యలు తీసుకోవాలనే డిమాండ్లు వినిపిస్తున్నాయి.

స్థానిక ఎన్నికలు సమీపంలో… అప్రమత్తంగా ఉండాలని మంత్రి లోకేశ్ సూచనలు!