ఎమ్మెల్సీ ఎన్నికల కౌంటింగ్… ఫలితాలు ఎప్పుడు?

MLC ఎన్నికల ఓట్ల లెక్కింపు:

తెలుగు రాష్ట్రాల్లో గ్రాడ్యుయేట్ ఎమ్మెల్సీ ఎన్నికల కౌంటింగ్ ప్రారంభమైంది. ఇవాళ(సోమవారం) గుంటూరు – కృష్ణ జిల్లాలలో గ్రాడ్యుయేట్ ఎమ్మెల్సీ కౌంటింగ్ ప్రారంభమైంది.

అమరావతి: ఆంధ్రప్రదేశ్, తెలంగాణ రాష్ట్రాలలో ఫిబ్రవరి 27న 6 ఎమ్మెల్సీ స్థానాలకు ఎన్నికలు నిర్వహించబడ్డాయి. ఈ ఎన్నికల కౌంటింగ్ ప్రక్రియ ఇవాళ(సోమవారం) ప్రారంభమైంది. బ్యాలెట్ బాక్సులు ఉండడంతో ఫలితాలు ఆలస్యం అవ్వవచ్చని ఎన్నికల అధికారులు అంచనా వేస్తున్నారు.

గుంటూరు జిల్లాలో ఉత్కంఠ:
గుంటూరు – కృష్ణ జిల్లాలలో గ్రాడ్యుయేట్ ఎమ్మెల్సీ కౌంటింగ్ ప్రారంభమైంది. తొలుత పోస్టల్ బ్యాలెట్ ఓట్ల లెక్కింపు ప్రారంభమైంది. ఈ పోస్టల్ ఓట్లలో కొన్ని చెల్లుబాటు కాని ఓట్లు కూడా ఉన్నాయి. ఉద్యోగులు సరిగా ఓట్లు వేయకపోవడంపై ఎన్నికల అధికారులు ఆశ్చర్యం వ్యక్తం చేస్తున్నారు.

ఏలూరు సీఆర్ రెడ్డి ఇంజనీరింగ్ కాలేజీలో కౌంటింగ్:
ఏలూరు: ఏలూరు సీఆర్ రెడ్డి ఇంజనీరింగ్ కాలేజీలో గ్రాడ్యుయేట్ ఎమ్మెల్సీ కౌంటింగ్ ప్రారంభమైంది. ఉమ్మడి తూర్పు పశ్చిమ గోదావరి జిల్లాల పట్టభద్రుల ఎమ్మెల్సీ కౌంటింగ్ కోసం ఏర్పాట్లు పూర్తయ్యాయి. ఉదయం 8 గంటలకు కౌంటింగ్ ప్రారంభమైంది. మొత్తం 2,18,902 ఓట్లు పోలయ్యాయి. మూడు షిప్ట్లలో 700 మంది సిబ్బందితో లెక్కింపు జరుగుతోంది. 28 టేబుల్స్, 17 రౌండ్లలో కౌంటింగ్ ప్రక్రియ కొనసాగుతోంది. ఫలితాలు వెలువడటానికి కనీసం రెండు రోజులు పట్టవచ్చునని ఎన్నికల అధికారులు అంచనా వేస్తున్నారు. కౌంటింగ్ కేంద్రం వద్ద పోలీసులు పటిష్ట బందోబస్తు ఏర్పాటు చేశారు.

విశాఖపట్నం: ఆంధ్ర విశ్వవిద్యాలయం ఈఈఈ విభాగంలో కౌంటింగ్:
విశాఖపట్నం: ఉత్తరాంధ్ర ఉపాధ్యాయుల ఎమ్మెల్సీ కౌంటింగ్ ప్రక్రియ ప్రారంభమైంది. ఆంధ్ర విశ్వవిద్యాలయం ఈఈఈ విభాగంలో ఉదయం 8 గంటల నుంచి ఓట్లు లెక్కిస్తున్నారు. 20 టేబుళ్లు ఏర్పాటు చేయబడ్డాయి. 100 మంది సిబ్బంది, 200 మంది పోలీసు సిబ్బంది, 160 మంది కౌంటింగ్ ఏజెంట్లు కౌంటింగ్ ప్రక్రియలో పాల్గొన్నారు. తొలి ప్రాధాన్యత ఓటుతో ఫలితం తేలితే, రాత్రి 8 గంటల లోపే విజేత ఎవరో తెలియవచ్చునని ఎన్నికల అధికారులు తెలిపారు.

కరీంనగర్: కరీంనగర్: తెలంగాణలో 3 ఎమ్మెల్సీ స్థానాల ఓట్ల లెక్కింపు ఉదయం 8 గంటలకు ప్రారంభమైంది. నల్గొండ, వరంగల్, ఖమ్మం, ఆదిలాబాద్, నిజామాబాద్, కరీంనగర్, మెదక్ పట్టభద్రులు, ఉపాధ్యాయుల ఎమ్మెల్సీ ఎన్నికలు ఇటీవల జరిగాయి. ఈ రోజు బ్యాలెట్ బాక్సులు తెరిచి కౌంటింగ్ ప్రారంభమైంది. మొత్తం 3,55,159 ఓట్లు ఉండగా, 2,50,106 ఓట్లు పోలయ్యాయి. టీచర్ ఎమ్మెల్సీ ఫలితం సాయంత్రం వెలువడే అవకాశం ఉంది. 15 మంది టీచర్స్ అభ్యర్థులు, 56 మంది పట్టభద్రుల అభ్యర్థులు పోటీ చేస్తున్నట్లు తెలుస్తోంది.

నల్గొండ:
నల్గొండ-ఖమ్మం-వరంగల్ ఉపాధ్యాయ ఎమ్మెల్సీ కౌంటింగ్ ఉదయం 8 గంటలకు ప్రారంభమైంది. 19 మంది అభ్యర్థులు పోటీలో ఉన్నారు. 93.57% పోలింగ్ నమోదైంది. 25 టేబుల్స్‌పై 25 రౌండ్లలో కౌంటింగ్ జరుగుతోంది. 350 మంది సిబ్బంది, 250 మంది పోలీసు సిబ్బంది కౌంటింగ్ ప్రక్రియలో పాల్గొన్నారు.