Gajuwaka లో బలమైన జనసేననేతగా పేరొందిన చింతలపూడి వెంకట్రామయ్య పార్టీకి రాజీనామా చేశారు. గత ఎన్నికల్లో ఆయన పెందుర్తి నుంచి పోటీ చేసి ఓడారు. గాజువాక కోసమే తాను రాజీనామా చేస్తున్నట్టు ఆయన పేర్కొన్నారు.
ఎన్నికల ఫలితాల తర్వాత జనసేన పార్టీకి నేతలు షాకిస్తున్నారు. ఇప్పటికే రావెల కిషోర్‌బాబు, చింతల పార్థసారథి, మారంశెట్టి రాఘవయ్య, అద్దేపల్లి శ్రీధర్‌, డేవిడ్ రాజు తదితరులు జనసేనను వీడారు. తాజాగా రాజమండ్రి మాజీ ఎమ్మెల్యే ఆకుల సత్యనారాయణ కూడా పార్టీకి రాజీనామా చేశారు. వీరి బాటలోనే విశాఖపట్నం గాజువాక మాజీ ఎమ్మెల్యే చింతలపూడి వెంకట్రామయ్య కూడా జనసేనకు గుడ్ బై చెప్పారు. త్వరలోనే ఆయన కూడా వైఎస్ఆర్సీపీలో చేరతాని ప్రచారం జరుగుతోంది.
జనసేన పార్టీకి రాజీనామా చేసిన చింతలపూడి.. పార్టీ అధినేత పవన్ క‌ళ్యాణ్‌కు రాజీనామా లేఖను పంపారు. గాజువాక నియోజకవర్గ ప్రజలు, అభిమానులు, కార్యకర్తల కోరిక మేరకు తాను జనసేన పార్టీకి, పార్టీ ప్రాథమిక సభ్యత్యానికి రాజీనామా చేస్తున్నట్లు ఆ లేఖలో పేర్కొన్నారు. గత 15 ఏళ్లుగా తాను గాజువాక నియోజకవర్గ ప్రజలకు అందుబాటులో ఉంటూ వారి కష్టసుఖాలతో పాలు పంచుకుంటున్నానని తెలిపారు.
‘అయిదేళ్లు శాసనసభ్యుడిగా పని చేసి… ప్రజలందరికి అనునిత్యం చేదోడు వాదోడుగా ఉన్నాను. భవిష్యత్‌లో కూడా రాజకీయంగా గాజువాక నియోజకవర్గంలో మాత్రమే ఉండాలని కార్యకర్తల, శ్రేయోభిలాషుల కోరిక మేరకు జనసేన పార్టీకి రాజీనామా చేస్తున్నా’నని వెంకట్రామయ్య తెలిపారు.
ఇటీవల జరిగిన ఎన్నికల్లో చింతలపూడి వెంకట్రామయ్య పెందుర్తి నుంచి పోటీ చేసి ఓడారు. గాజువాకలో జనసేన పార్టీ బలోపేతానికి ఆయన తీవ్రంగా కృషి చేశారు. దీంతో జనసేనకు గాజువాకలో లక్షకుపైగా సభ్యత్వాలు వచ్చాయి. చింతలపూడి గాజువాక నుంచే బరిలో దిగుతారని భావించారు. కానీ పవన్ కళ్యాణ్ అక్కడి నుంచి పోటీ చేసి ఓడారు. నియోజకవర్గం మారడంతో చింతలపూడి కూడా ఓటమిపాలయ్యారు. తాను గాజువాక నుంచే పోటీ చేసి ఉంటే.. కచ్చితంగా గెలిచేవాడిననే భావనలో చింతలపూడి ఉన్నారు.
చింతలపూడి వెంకట్రామయ్య 2009లో ప్రజారాజ్యం తరఫున పోటీ చేసి విజయం సాధించారు. 17 వేల ఓట్ల తేడాతో ఆయన గెలుపొందారు. పీఆర్పీ నాటి నుంచి పట్టున్న స్థానం కావడంతోనే జనసేనాని ఇక్కడి నుంచి పోటీకి దిగారు.
Discover more from Telugu Wonders
Subscribe to get the latest posts sent to your email.
