శ్రీశైలంలో చెంచులకు అద్భుత అవకాశం

ఈ నెలలో రెండోసారి ఉచిత స్పర్శ దర్శనం

శ్రీశైలం ఆలయంలో చెంచు గిరిజనులకు మరోసారి అరుదైన అవకాశం లభించింది. శ్రీశైలం దేవస్థానం పాలకమండలి నిర్ణయం మేరకు ప్రతి నెల చివరి బుధవారం చెంచులకు ఉచిత స్పర్శ దర్శనం కల్పిస్తోంది. ఈ కార్యక్రమం జనవరిలో రెండోసారి విజయవంతంగా నిర్వహించారు.

బుధవారం రోజు మేకలబండ, హఠకేశ్వరం, సున్నిపెంట, పల్నాడు, మాచర్ల, దుర్గి మండలాలకు చెందిన చెంచు గిరిజనులు మల్లన్నను దర్శించుకున్నారు. మొత్తం 232 మంది చెంచులకు స్వామివారి స్పర్శ దర్శనం, అమ్మవారి దర్శన భాగ్యం కల్పించారు. ఈ దర్శన కార్యక్రమంలో ఆలయ ధర్మకర్తల మండలి చైర్మన్ రమేష్ నాయుడు, ఈవో శ్రీనివాసరావు చెంచుల వెంట పాల్గొన్నారు.

గత నెల ముక్కోటి ఏకాదశి సందర్భంగా ప్రారంభమైన ఈ ఉచిత స్పర్శ దర్శనం కార్యక్రమం ఇకపై ప్రతి నెల చివరి బుధవారం కొనసాగుతుందని దేవస్థానం అధికారులు తెలిపారు. చెంచు గిరిజనులు తమ సంప్రదాయ వేషధారణలో, తప్పెట చప్పుళ్లతో, సంప్రదాయ నృత్యాలు చేస్తూ ఆలయానికి చేరుకోవడం భక్తులను ఆకట్టుకుంది. ఆలయ అధికారులు, సిబ్బంది వారికి ఘనస్వాగతం పలికి దర్శన ఏర్పాట్లు చేశారు.

భక్తులకు ఉచిత లడ్డూల పంపిణీ

శ్రీశైలం మహాక్షేత్రంలో రూ.500 స్పర్శ దర్శనం, రూ.300 అతి శీఘ్ర దర్శనం టిక్కెట్లు కొనుగోలు చేసిన భక్తులకు ఉచిత లడ్డూల పంపిణీ కొనసాగుతోంది. ఈ కార్యక్రమం డిసెంబర్ నెల నుంచి అమలులో ఉంది.
భక్తులకు సౌకర్యంగా ఉండేలా 9, 10 కౌంటర్ల ద్వారా లడ్డూలను అందిస్తున్నారు.

• రూ.500 స్పర్శ దర్శనం టిక్కెట్‌కు 100 గ్రాముల రెండు లడ్డూలు

• రూ.300 అతి శీఘ్ర దర్శనం టిక్కెట్‌కు ఒక లడ్డు ఉచితంగా ఇస్తున్నారు.

అలాగే భ్రమరాంబాదేవి ఆలయం వెనుక భాగంలోని కైలాస కంకణాల కౌంటర్ వద్ద, అలాగే రథశాల వద్ద కొత్త విరాళ కేంద్రాలను ప్రారంభించారు. భక్తులు ఈ కేంద్రాల ద్వారా తమ విరాళాలను అందించవచ్చని దేవస్థానం అధికారులు తెలిపారు.

చెంచు గిరిజనుల ఆధ్యాత్మిక ప్రాముఖ్యతను గుర్తించి వారికి ఈ అవకాశం కల్పించడం ఆనందకరమని ఆలయ అధికారులు పేర్కొన్నారు.