యాదాద్రి కొండ గుహలో దాగి ఉన్న రహస్యాలివే..! నరసింహస్వామి దివ్య స్వరూపాల గురించి తెలుసా..?

యాదర్శి మహర్షి తపస్సు – క్షేత్ర ఆవిర్భావం

స్కాంద పురాణం ప్రకారం, ఋష్యశృంగ మహర్షి కుమారుడైన యాదర్శి విష్ణుమూర్తిపై అపార భక్తి కలిగిన మహర్షి. హిరణ్యకశిపుని సంహరించిన అనంతరం స్వామి ధరించిన ఉగ్ర నరసింహ రూపాన్ని దర్శించాలనే కోరికతో ఆయన యాదగిరిగుట్ట ప్రాంతంలో రావిచెట్టు కింద దీర్ఘ తపస్సు చేశారు. ఆయన భక్తికి ప్రసన్నుడైన నరసింహస్వామి ఐదు దివ్య స్వరూపాలలో దర్శనమిచ్చారు. అవే లక్ష్మీనరసింహ, యోగానంద నరసింహ, జ్వాలా నరసింహ, గండభేరుండ నరసింహ, ఉగ్ర నరసింహ. యాదర్శి స్వామిలో ఐక్యమవడంతో ఈ ప్రాంతం యాదగిరిగుట్టగా ప్రసిద్ధి చెందింది.

కలియుగంలో స్వామి పునర్దర్శనం

త్రేతాయుగం తర్వాత అవ్యక్త రూపంలో ఉన్న స్వామి, కలియుగంలో తిరిగి భక్తులకు దర్శనమివ్వాలని సంకల్పించారని పురాణాలు చెబుతున్నాయి. కొండ కింద నివసించే ఓ కోయ వనితకు స్వామి కలలో దర్శనమిచ్చి, కొండపై తన స్వరూపాలను కనుగొనమని ఆదేశించడంతో ఆలయ మహిమ మళ్లీ వెలుగులోకి వచ్చింది. నిర్మలమైన భక్తి ఉంటే చాలు, భగవత్ కృప అందరికీ సమానమనే సందేశాన్ని ఈ ఘటన తెలియజేస్తుంది.

పంచ నరసింహ స్వరూపాల దర్శనం

యాదాద్రిలో భక్తులు ఐదు నరసింహ స్వరూపాలను దర్శించవచ్చని విశ్వాసం ఉంది.

1. లక్ష్మీనరసింహ స్వామి: హిరణ్యకశిపుని సంహారం అనంతరం లక్ష్మీదేవి శాంతింపజేసిన స్వామి రూపం. ఆలయం వెలుపల ఉన్న విగ్రహాలు ఈ స్వరూపానికి ప్రతీకగా భావిస్తారు.

2. యోగానంద నరసింహ స్వామి: గుహాలయంలోని ప్రధాన అర్చామూర్తి. అర్చనల సమయంలో ఈ రూపం స్పష్టంగా దర్శనమిస్తుంది.

3. జ్వాలా నరసింహ స్వామి: గుహలో సర్పరూపంలో ఉన్నారని నమ్మకం. నిరంతరం వెలిగే అఖండ దీపాన్ని జ్వాలా నరసింహ స్వరూపంగా భావిస్తారు. ధ్యానం చేసే ఉపాసకులకు అగ్ని లేదా సర్ప స్వరూపంగా దర్శనమిస్తారని విశ్వాసం.

4. గండభేరుండ నరసింహ స్వామి: గర్భాలయం సమీపంలోని బండ చీలిక వద్ద అలాగే ఆలయ ప్రాంగణంలోని అష్టభుజ మండపంలో చెక్కిన రూపంలో దర్శనమిస్తారని చెబుతారు.

5. ఉగ్ర నరసింహ స్వామి: ఆలయంలో ప్రత్యక్షంగా కనిపించకపోయినా, యాదగిరిగుట్ట కొండ మొత్తాన్ని ఈ స్వామి శక్తి ఆవరించి ఉందని భక్తుల నమ్మకం. గిరి ప్రదక్షిణం చేస్తే దుష్టశక్తుల నుంచి రక్షణ లభిస్తుందని విశ్వసిస్తారు.

వైద్య నారాయణస్వామి మహిమ

యాదగిరిగుట్ట నరసింహస్వామిని “వైద్య నారాయణస్వామి”గా కూడా పూజిస్తారు. ఇక్కడ దర్శనం చేసుకుంటే శారీరక, మానసిక వ్యాధులు తగ్గుతాయని భక్తుల విశ్వాసం. అనారోగ్యంతో బాధపడిన ఓ మహిళ 11 రోజుల పాటు ఆలయంలో నివసించి గిరి ప్రదక్షిణం చేసిన తర్వాత స్వామి కృపతో పూర్తిగా కోలుకున్నట్లు చెప్పబడే సంఘటన ఈ క్షేత్ర మహిమను తెలియజేస్తుంది.

యాదాద్రి దర్శన విశేషాలు

ప్రస్తుతం యాదాద్రి ఆలయాన్ని అద్భుతంగా అభివృద్ధి చేశారు. గిరి ప్రదక్షిణ మార్గం, పచ్చని పరిసరాలు, లక్ష్మీ పుష్కరిణి వంటి సౌకర్యాలు భక్తులకు ఆధ్యాత్మిక అనుభూతిని మరింత ప్రత్యేకంగా మారుస్తున్నాయి. యాదర్శి తపస్సు చేసిన స్థలాన్ని దర్శించి, గిరి ప్రదక్షిణం చేస్తే స్వామి అనుగ్రహం లభిస్తుందని భక్తులు నమ్ముతారు.