ఐరన్ లోపమా..? తలసేమియానా..? రెండింటి మధ్య తేడాలు ఇవే.. నిర్లక్ష్యం చేస్తే ప్రమాదమే!

చాలా మంది రక్తహీనత సమస్యను సాధారణ ఐరన్ లోపంగా భావించి నిర్లక్ష్యం చేస్తుంటారు. అయితే ప్రతి రక్తహీనత ఐరన్ లోపం వల్లే వస్తుందని అనుకోవడం తప్పు అని వైద్య నిపుణులు హెచ్చరిస్తున్నారు. ముఖ్యంగా తలసేమియా అనే జన్యుపరమైన రక్త వ్యాధిని చాలా మంది గుర్తించకుండా ఐరన్ టాబ్లెట్లు వాడటం వల్ల మరింత ప్రమాదంలో పడే అవకాశముందని డాక్టర్లు చెబుతున్నారు. తలసేమియా మరియు ఐరన్ లోపం లక్షణాలు ఒకేలా కనిపించినప్పటికీ, ఇవి పూర్తిగా వేర్వేరు వ్యాధులని నిపుణులు స్పష్టం చేస్తున్నారు.

Dr. Vamsi V వివరాల ప్రకారం తలసేమియా అనేది వంశపారంపర్యంగా వచ్చే రక్త సంబంధిత వ్యాధి. శరీరంలో హిమోగ్లోబిన్ ఉత్పత్తి సరిగా జరగకపోవడం వల్ల ఈ సమస్య వస్తుంది. హిమోగ్లోబిన్ అనేది రక్తంలో ఆక్సిజన్‌ను శరీర భాగాలకు తీసుకెళ్లే ముఖ్యమైన ప్రోటీన్. ఇది తక్కువగా తయారైతే ఎర్ర రక్త కణాలు త్వరగా నశించి రక్తహీనత ఏర్పడుతుంది.

తలసేమియాను ప్రధానంగా ఆల్ఫా తలసేమియా, బీటా తలసేమియా అనే రెండు రకాలుగా విభజిస్తారు. ఈ వ్యాధి తల్లిదండ్రుల నుంచి పిల్లలకు సంక్రమించే అవకాశం ఉంటుంది. తల్లిదండ్రుల్లో ఎవరికైనా తలసేమియా ట్రైట్ ఉంటే పిల్లలకు ఈ సమస్య వచ్చే ప్రమాదం ఉంటుంది.

తలసేమియా ఉన్నవారిలో కొన్ని ముఖ్యమైన లక్షణాలు కనిపిస్తాయి. ఎప్పుడూ అలసటగా ఉండటం, చర్మం పాలిపోయినట్లు కనిపించడం, పిల్లల్లో ఎదుగుదల మందగించడం, కడుపు ఉబ్బినట్లు అనిపించడం, ముదురు రంగు మూత్రం రావడం వంటి లక్షణాలు సాధారణంగా కనిపిస్తాయి. కొంతమందిలో ముఖ ఎముకల ఆకారంలో మార్పులు కూడా రావచ్చు.

ఇక ఐరన్ లోపం విషయానికి వస్తే, శరీరంలో తగినంత ఐరన్ లేకపోవడం వల్ల హిమోగ్లోబిన్ ఉత్పత్తి తగ్గిపోతుంది. సరైన ఆహారం తీసుకోకపోవడం, అధిక రక్తస్రావం, లేదా శరీరం ఐరన్‌ను సరిగా గ్రహించకపోవడం వల్ల ఈ సమస్య వస్తుంది. ఐరన్ లోపం ఉన్నవారిలో చిన్న పని చేసినా ఆయాసం రావడం, తలనొప్పి, కళ్లు తిరగడం, చేతులు కాళ్లు చల్లబడటం, గోర్లు పెళుసుగా మారడం వంటి లక్షణాలు కనిపిస్తాయి. కొంతమందికి మట్టి, ఐస్ ముక్కలు లేదా సున్నం తినాలనిపించడం వంటి వింత కోరికలు కూడా వస్తాయి.

ఈ రెండు వ్యాధుల లక్షణాలు ఒకేలా ఉండటం వల్ల చాలా మంది తలసేమియాను గుర్తించకుండా ఐరన్ టాబ్లెట్లు వాడుతుంటారు. అయితే తలసేమియా రోగులు అనవసరంగా ఐరన్ తీసుకుంటే శరీరంలో ఐరన్ అధికమై గుండె, కాలేయంపై తీవ్ర ప్రభావం పడే ప్రమాదం ఉందని నిపుణులు హెచ్చరిస్తున్నారు.

అందుకే రక్తహీనత లక్షణాలు కనిపిస్తే కేవలం ఐరన్ లోపమని భావించకుండా తప్పనిసరిగా వైద్య పరీక్షలు చేయించుకోవాలి. Complete Blood Count (CBC), Hb Electrophoresis వంటి పరీక్షల ద్వారా అసలు సమస్య ఏంటో స్పష్టంగా తెలుసుకోవచ్చు. సరైన నిర్ధారణతోనే సరైన చికిత్స పొందడం సాధ్యమవుతుంది.