కాంగోలో ఎబోలా కలకలం.. లక్షణాలతో 220 మంది మృతి….

ఆఫ్రికా దేశాల్లో మరోసారి ఎబోలా వైరస్ భయాందోళనలు సృష్టిస్తోంది. ముఖ్యంగా డెమోక్రటిక్ రిపబ్లిక్ ఆఫ్ కాంగోలో పరిస్థితి రోజురోజుకూ విషమంగా మారుతున్నట్లు ప్రపంచ ఆరోగ్య సంస్థ (WHO) హెచ్చరించింది. ఎబోలా లక్షణాలతో ఇప్పటికే 220 మంది మరణించినట్లు డబ్ల్యూహెచ్‌ఓ చీఫ్ టెడ్రోస్ అధనోమ్ ఘెబ్రేయెసస్ వెల్లడించారు. అలాగే అనుమానిత మరియు నిర్ధారిత కేసుల సంఖ్య వేగంగా పెరుగుతూ ప్రస్తుతం 990కు చేరిందని తెలిపారు.

ప్రపంచ దేశాలు ఇప్పటికైనా అప్రమత్తం కావాలని, ఎబోలా వ్యాప్తిని తక్కువగా అంచనా వేయకూడదని డబ్ల్యూహెచ్‌ఓ హెచ్చరించింది. ప్రస్తుతం వైరస్ వ్యాప్తి వేగంగా జరుగుతోందని, తక్షణ చర్యలు తీసుకోకపోతే పరిస్థితి మరింత ప్రమాదకరంగా మారే అవకాశం ఉందని నిపుణులు ఆందోళన వ్యక్తం చేస్తున్నారు.

కాంగో ప్రభుత్వ అధికారిక గణాంకాల ప్రకారం ఇప్పటివరకు 101 ఎబోలా నిర్ధారిత కేసులు, 10 మరణాలు నమోదయ్యాయి. అయితే వాస్తవ పరిస్థితి అధికారిక లెక్కల కంటే మరింత తీవ్రంగా ఉందని డబ్ల్యూహెచ్‌ఓ అభిప్రాయపడుతోంది. గ్రామీణ ప్రాంతాల్లో సరైన వైద్య సదుపాయాలు లేకపోవడం, పరీక్షలు పరిమితంగా ఉండడం వల్ల అనేక కేసులు గుర్తించబడకుండా ఉండే అవకాశముందని అధికారులు చెబుతున్నారు.

ప్రస్తుతం కాంగో ఆరోగ్య శాఖ, వైద్య బృందాలు, అంతర్జాతీయ ఆరోగ్య సంస్థలు కలిసి వైరస్ నియంత్రణ కోసం యుద్ధ ప్రాతిపదికన చర్యలు చేపడుతున్నాయి. బాధితులను ఐసోలేషన్‌లో ఉంచడం, సంప్రదించిన వ్యక్తులను గుర్తించడం, ప్రజల్లో అవగాహన కల్పించడం వంటి కార్యక్రమాలు కొనసాగుతున్నాయి.

డబ్ల్యూహెచ్‌ఓ ఇప్పటికే ఈ నెల 17న ఎబోలా వ్యాప్తిని “ప్రజారోగ్య అత్యవసర పరిస్థితి”గా ప్రకటించింది. వైరస్ కేవలం కాంగోకే పరిమితం కాకుండా పొరుగు దేశాలకు కూడా వ్యాపిస్తున్నట్లు సమాచారం. ముఖ్యంగా ఉగాండాలో ఇప్పటివరకు ఐదు కేసులు నమోదవగా, ఒకరు మరణించినట్లు అధికారిక సమాచారం వెల్లడించింది.

ప్రస్తుతం వ్యాప్తి చెందుతున్న “బండిబుగ్యో ఎబోలా వైరస్” ప్రపంచ ఆరోగ్య నిపుణులను మరింత ఆందోళనకు గురిచేస్తోంది. ఈ వైరస్‌కు ఇప్పటివరకు డబ్ల్యూహెచ్‌ఓ ఆమోదించిన వ్యాక్సిన్ లేదా ప్రత్యేక చికిత్స అందుబాటులో లేదు. ఇదే కారణంగా పరిస్థితి మరింత సవాలుగా మారింది.

గతంలో ఈ రకం ఎబోలా వైరస్ కేవలం రెండుసార్లు మాత్రమే నమోదైంది. 2007లో ఉగాండాలో మొదటిసారి ఈ స్ట్రెయిన్ గుర్తించగా, 2012లో కాంగోలో మరోసారి వ్యాప్తి చెందింది. ఇప్పుడు మళ్లీ అదే వైరస్ తిరిగి వెలుగులోకి రావడం ప్రపంచ ఆరోగ్య సంస్థలను అప్రమత్తం చేసింది.

ఎబోలా వైరస్ అత్యంత ప్రమాదకర అంటువ్యాధుల్లో ఒకటి. ఈ వైరస్ సోకినవారిలో తీవ్రమైన జ్వరం, బలహీనత, వాంతులు, విరేచనాలు, శరీరంలో అంతర్గత లేదా బాహ్య రక్తస్రావం వంటి లక్షణాలు కనిపిస్తాయి. బాధితుల శరీర ద్రవాల ద్వారా వైరస్ వేగంగా వ్యాపిస్తుంది. అందుకే వైద్య సిబ్బంది ప్రత్యేక రక్షణ పరికరాలతో చికిత్స అందిస్తున్నారు.

అంతర్జాతీయ ప్రయాణాలు పెరుగుతున్న నేపథ్యంలో ప్రపంచ దేశాలు విమానాశ్రయాల్లో ప్రత్యేక స్క్రీనింగ్ చర్యలు చేపడుతున్నాయి. భారతదేశం సహా అనేక దేశాలు ఆఫ్రికా నుంచి వచ్చే ప్రయాణికులపై నిఘా పెంచాయి. ఇప్పటికే భారత్‌లోని పలు విమానాశ్రయాల్లో థర్మల్ స్క్రీనింగ్ నిర్వహిస్తున్నారు.

డబ్ల్యూహెచ్‌ఓ చీఫ్ టెడ్రోస్ మాట్లాడుతూ, ఎబోలా వ్యాప్తిని అరికట్టడానికి అంతర్జాతీయ సహకారం అత్యవసరమని అన్నారు. ప్రపంచ దేశాలు సమిష్టిగా పనిచేస్తేనే ఈ వైరస్‌ను అదుపులోకి తీసుకురావడం సాధ్యమవుతుందని పేర్కొన్నారు.