పిల్లి కోసం పోలీస్ స్టేషన్..సీసీటీవీ ఫుటేజ్‌లో బయటపడ్డ అసలు కథ!

హైదరాబాద్‌లో చిన్న విషయమే పెద్ద చర్చకు దారి తీసిన ఆసక్తికర ఘటన వెలుగులోకి వచ్చింది. ఒక పెంపుడు పిల్లి కనిపించకపోవడంతో ప్రారంభమైన వివాదం చివరకు పోలీస్ స్టేషన్ వరకు చేరింది.

లల్లాగూడ పరిధిలోని అడ్డగుట్టకు చెందిన ఓ మహిళ తన పెంపుడు పిల్లి కనిపించడంలేదని పోలీసులను ఆశ్రయించింది. తన ఇంటి వద్ద ఉన్న పిల్లిని ఓ వ్యక్తి తీసుకెళ్లాడని ఆమె అనుమానం వ్యక్తం చేసింది.

సీసీటీవీ ఫుటేజ్‌ను పరిశీలించిన ఆమె, బైక్ నంబర్ ఆధారంగా ఒక వ్యక్తిని గుర్తించి ఫిర్యాదు చేసింది. పోలీసులు వెంటనే స్పందించి, అనుమానితుడిని స్టేషన్‌కు పిలిపించి విచారణ చేపట్టారు.

విచారణలో ఆ వ్యక్తి చింతల్ ప్రాంతానికి చెందిన మొక్కల వ్యాపారి అని తేలింది. అయితే అతడు చెప్పిన ప్రకారం, పిల్లిని పట్టుకునే సమయంలో అది తనను కరిచి పారిపోయిందని వివరించాడు.

అయినా మహిళ తన పిల్లిని తిరిగి ఇవ్వాలని పట్టుబడటంతో ఇద్దరి మధ్య వాగ్వాదం చోటుచేసుకుంది. ఈ పరిస్థితిని చక్కదిద్దేందుకు పోలీస్ ఇన్స్పెక్టర్ ఇద్దరికీ కౌన్సెలింగ్ ఇచ్చారు.

చివరికి ఆ వ్యక్తి క్షమాపణ చెప్పడంతో సమస్య తాత్కాలికంగా పరిష్కారమైంది. పోలీసులు అతనికి హెచ్చరిక జారీ చేసి వదిలేశారు.