కృష్ణా జిల్లాలో భయానక ఘటన.. పోలీస్ జీప్‌లో టపాసుల పేలుడు…

ఆంధ్రప్రదేశ్‌లోని కృష్ణా జిల్లాలో విషాదకర ఘటన చోటుచేసుకుంది. చల్లపల్లి పోలీస్ స్టేషన్కు చెందిన వాహనంలో ఆకస్మికంగా పేలుడు సంభవించి, ఎస్సై సహా నలుగురు పోలీసు సిబ్బంది తీవ్రంగా గాయపడ్డారు.

దీపావళి సందర్భంగా స్వాధీనం చేసుకున్న టపాసులను తరలిస్తున్న సమయంలో ఈ ప్రమాదం జరిగింది. వాహనంలో ఉన్న టపాసులు ఒక్కసారిగా పేలిపోవడంతో భారీ మంటలు చెలరేగి, వాహనం పూర్తిగా దగ్ధమైంది.

గాయపడిన వారిని వెంటనే సమీప ఆస్పత్రికి తరలించి చికిత్స అందిస్తున్నారు. వీరిలో ఇద్దరి పరిస్థితి విషమంగా ఉన్నట్లు వైద్యులు తెలిపారు.

ఈ ఘటనపై పోలీసులు దర్యాప్తు ప్రారంభించారు. ఇది ప్రమాదవశాత్తు జరిగినదా లేదా ఎవరి ప్రమేయం ఉందా అనే కోణాల్లో విచారణ కొనసాగుతోంది