తమిళనాడులో కొత్తగా అధికారంలోకి వచ్చిన టీవీకే ప్రభుత్వం కీలక నిర్ణయాలతో ముందుకు సాగుతోంది. ముఖ్యమంత్రి Joseph Vijay అధికార బాధ్యతలు చేపట్టిన తర్వాత తీసుకున్న తాజా నిర్ణయం రాష్ట్రవ్యాప్తంగా చర్చనీయాంశంగా మారింది. ముఖ్యంగా మందుబాబులకు షాక్ ఇచ్చేలా ప్రభుత్వం 717 టాస్మాక్ మద్యం దుకాణాలను మూసివేయాలని నిర్ణయించింది. ప్రార్థనా స్థలాలు, విద్యాసంస్థలు, బస్ స్టాండ్‌ల సమీపంలో ఉన్న ఈ మద్యం దుకాణాలను వచ్చే రెండు వారాల్లో పూర్తిగా తొలగించాలని అధికారులకు ఆదేశాలు జారీ చేశారు.

తమిళనాడు ప్రభుత్వం ఆధ్వర్యంలో నడిచే టాస్మాక్ మద్యం దుకాణాలు రాష్ట్రవ్యాప్తంగా వేల సంఖ్యలో ఉన్నాయి. ప్రస్తుతం తమిళనాడులో మొత్తం 4,765 టాస్మాక్ షాపులు కార్యకలాపాలు నిర్వహిస్తున్నాయి. వీటిలో ప్రజా ప్రదేశాలకు అత్యంత సమీపంలో ఉన్న 717 దుకాణాలను గుర్తించి మూసివేయాలని సీఎం విజయ్ నిర్ణయం తీసుకున్నారు. ఇందులో 276 దుకాణాలు దేవాలయాలు, మసీదులు, చర్చిల సమీపంలో ఉండగా, 186 షాపులు పాఠశాలలు మరియు కళాశాలల దగ్గర ఉన్నాయి. అలాగే 255 మద్యం దుకాణాలు బస్ స్టాండ్‌ల పరిసరాల్లో కొనసాగుతున్నట్లు ప్రభుత్వ లెక్కలు చెబుతున్నాయి.

ప్రభుత్వం విడుదల చేసిన తాజా మార్గదర్శకాల ప్రకారం దేవాలయాలు, పాఠశాలలు, కళాశాలలు, మసీదులు, చర్చిలు మరియు బస్ స్టాండ్‌లకు 500 మీటర్ల పరిధిలో ఎలాంటి మద్యం దుకాణాలు ఉండకూడదని స్పష్టం చేసింది. ఈ నిర్ణయం సామాజిక బాధ్యతతో తీసుకున్నదని ప్రభుత్వం చెబుతోంది. ప్రజల్లో, ముఖ్యంగా యువతలో పెరుగుతున్న మద్యం ప్రభావాన్ని తగ్గించడమే ప్రధాన లక్ష్యమని అధికారులు వెల్లడించారు.

సీఎం విజయ్ తీసుకున్న ఈ నిర్ణయానికి రాష్ట్రవ్యాప్తంగా మిశ్రమ స్పందన కనిపిస్తోంది. మహిళా సంఘాలు, తల్లిదండ్రులు, సామాజిక కార్యకర్తలు ఈ చర్యను స్వాగతిస్తున్నారు. విద్యాసంస్థల దగ్గర మద్యం దుకాణాలు ఉండటం వల్ల విద్యార్థులపై ప్రతికూల ప్రభావం పడుతోందని చాలా కాలంగా ఆరోపణలు ఉన్నాయి. ఇప్పుడు ప్రభుత్వం వాటిని తొలగించడంతో ప్రజలు ఊపిరిపీల్చుకుంటున్నారు.

మరోవైపు టాస్మాక్ ఆదాయంపై ఆధారపడే ప్రభుత్వ ఖజానాపై ఈ నిర్ణయం ప్రభావం చూపే అవకాశముందని ఆర్థిక నిపుణులు అభిప్రాయపడుతున్నారు. అయినప్పటికీ సామాజిక సంక్షేమానికి ప్రాధాన్యత ఇస్తూ సీఎం విజయ్ ఈ నిర్ణయం తీసుకోవడం రాజకీయ వర్గాల్లో ఆసక్తికరంగా మారింది. ముఖ్యమంత్రి అయ్యాక ప్రజల ముందు ఇచ్చిన హామీలను అమలు చేయడంలో విజయ్ వేగంగా ముందుకెళ్తున్నారని టీవీకే నేతలు చెబుతున్నారు.

ఇటీవల తమిళనాడులో రాజకీయాల్లో సంచలనం సృష్టించిన విజయ్, ఇప్పుడు పరిపాలనా నిర్ణయాలతో కూడా ప్రత్యేక గుర్తింపు తెచ్చుకుంటున్నారు. రాష్ట్రంలో మద్యం నియంత్రణపై మరిన్ని కఠిన నిర్ణయాలు వచ్చే అవకాశముందని రాజకీయ విశ్లేషకులు భావిస్తున్నారు. ప్రస్తుతం 717 టాస్మాక్ షాపుల మూసివేత నిర్ణయం తమిళనాడులో పెద్ద చర్చకు దారితీసింది.