కోనేరులో మునిగి ముగ్గురు చిన్నారుల మృతి.. జగిత్యాలలో విషాదం

జగిత్యాల జిల్లాలో జరిగిన విషాద ఘటన రెండు కుటుంబాల్లో తీరని దుఃఖాన్ని మిగిల్చింది. దేవుడికి మొక్కులు చెల్లించుకునేందుకు ఆనందంగా వెళ్లిన కుటుంబాలకు అనూహ్యంగా విషాదం ఎదురైంది. మేడిపల్లి మండలం కొండాపూర్‌లోని కోనేరులో మునిగి ముగ్గురు చిన్నారులు ప్రాణాలు కోల్పోవడంతో గ్రామంలో విషాద ఛాయలు అలుముకున్నాయి.

స్థానికుల వివరాల ప్రకారం, కొండాపూర్ గ్రామానికి చెందిన వడ్లగట్ట శేఖర్‌, భార్గవి దంపతులు ఇటీవల తమ కుటుంబంలో శుభకార్యం జరగనున్న నేపథ్యంలో గ్రామ శివారులో ఉన్న గంగమ్మ తల్లి ఆలయంలో మొక్కులు తీర్చుకోవాలని నిర్ణయించారు. భార్గవి గర్భవతి కావడంతో కుటుంబ సభ్యులతో కలిసి ప్రత్యేక పూజలు నిర్వహించేందుకు బుధవారం ఆలయానికి వెళ్లారు. ఈ సందర్భంగా జగిత్యాలలో నివసిస్తున్న భార్గవి అక్క భారతీ, బావ నాగభూషణం కుటుంబాన్ని కూడా ఆహ్వానించారు.

భారతీ-నాగభూషణం దంపతులు తమ ఇద్దరు పిల్లలు మన్విత్ సాయి (13), మనస్విని (11)తో కలిసి కొండాపూర్‌కు వచ్చారు. అలాగే శేఖర్‌, భార్గవి దంపతుల కుమారుడు శర్వాంద్ శివ (7) కూడా వారితో ఉన్నాడు. కుటుంబ సభ్యులంతా కలిసి ఆలయంలో పూజలు నిర్వహించి, అక్కడే వంటలు చేసుకుని భోజనాలు చేశారు. పిల్లలు, పెద్దలు అందరూ ఆనందంగా గడిపారు.

అయితే కొద్ది సేపటి తర్వాత పిల్లలు ఆడుకుంటామని చెప్పి ఆలయం సమీపంలోని కోనేరు వద్దకు వెళ్లారు. ఆడుకుంటూ ఉండగా ప్రమాదవశాత్తూ ముగ్గురు చిన్నారులు కోనేరులో పడి మునిగిపోయారు. కొంతసేపటి తర్వాత పిల్లలు కనిపించకపోవడంతో కుటుంబ సభ్యులు ఆందోళన చెందారు. చుట్టుపక్కల వెతుకుతుండగా కోనేరులో పిల్లలు విగతజీవులుగా కనిపించారు.

వెంటనే కుటుంబ సభ్యులు, గ్రామస్థులు కలిసి చిన్నారులను బయటకు తీసి ప్రాణాలు కాపాడేందుకు ప్రయత్నించారు. సీపీఆర్ కూడా నిర్వహించినప్పటికీ ఫలితం లేకపోయింది. అప్పటికే ముగ్గురు చిన్నారులు మృతి చెందినట్లు తెలిసి కుటుంబ సభ్యులు కన్నీరుమున్నీరయ్యారు. కేవలం పది నిమిషాల వ్యవధిలోనే తమ జీవితాల్లో ఇంత పెద్ద విషాదం చోటుచేసుకుందని వారు విలపించారు.

మృతి చెందిన శర్వాంద్ శివ కోరుట్ల పబ్లిక్ స్కూల్‌లో రెండో తరగతి చదువుతున్నాడు. మన్విత్ సాయి, మనస్విని జగిత్యాలలోని ఓ ప్రైవేట్ పాఠశాలలో వరుసగా ఏడో, ఆరవ తరగతులు అభ్యసిస్తున్నారు. ఈ ముగ్గురు చిన్నారులు చదువులో చురుకుగా ఉండటంతో పాటు కుటుంబ సభ్యులకు ఎంతో ఇష్టమైనవారని బంధువులు తెలిపారు.

నాగభూషణం-భారతీ దంపతులు జగిత్యాలలో ఓ షాపింగ్ మాల్‌లో ఉద్యోగాలు చేస్తున్నారు. తమ ఇద్దరు పిల్లలను కోల్పోవడంతో వారు తీవ్ర మానసిక వేదనలో మునిగిపోయారు. “పిల్లలు లేని జీవితం మాకు ఎందుకు?” అంటూ వారు రోదించిన తీరు అక్కడున్న ప్రతి ఒక్కరినీ కంటతడి పెట్టించింది.

సమాచారం అందుకున్న కోరుట్ల సీఐ లక్ష్మీనారాయణ ఘటనాస్థలాన్ని పరిశీలించారు. మృతుల బంధువుల ఫిర్యాదు మేరకు పోలీసులు కేసు నమోదు చేసి దర్యాప్తు చేపట్టారు. ఈ ఘటనతో గ్రామమంతా విషాదంలో మునిగిపోయింది. చిన్నారుల మృతితో రెండు కుటుంబాల్లోనే కాదు, మొత్తం ప్రాంతంలోనే శోకసంద్రం నెలకొంది.