అల్లుడిపై ప్రేమకు అద్దం.. కిలోన్నర వెండితో ప్రత్యేక చెప్పులు తయారు చేసిన మామ

అల్లుడిపై ఉన్న ప్రేమను చూపించేందుకు ఓ మామ చేసిన పని ప్రస్తుతం సోషల్ మీడియాలో వైరల్‌గా మారింది. మహారాష్ట్రలో జరిగిన ఈ ఘటనలో, ఒక వ్యక్తి తన అల్లుడికి సాధారణ కానుకలు కాకుండా ఏకంగా కిలోన్నర వెండితో ప్రత్యేక కొల్హాపురి చెప్పులు తయారు చేయించి అందరినీ ఆశ్చర్యానికి గురిచేశాడు. ఈ విలాసవంతమైన చెప్పుల తయారీ కోసం దాదాపు రూ.4.25 లక్షల వరకు ఖర్చు చేసినట్లు సమాచారం.

భారతీయ సంప్రదాయాల్లో అల్లుళ్లకు ప్రత్యేక గౌరవం ఉంటుంది. ముఖ్యంగా అధిక మాసం సమయంలో అల్లుడికి బంగారం, వెండి వంటి విలువైన వస్తువులు బహుమతిగా ఇవ్వడం కొన్ని ప్రాంతాల్లో ఆనవాయితీగా కొనసాగుతోంది. అదే సంప్రదాయాన్ని మరింత ప్రత్యేకంగా నిలబెట్టేందుకు ఈ కుటుంబం వినూత్న ఆలోచన చేసింది. సాధారణ వెండి వస్తువుల స్థానంలో నేరుగా ధరించగలిగే కొల్హాపురి చెప్పులను వెండితో తయారు చేయించాలని నిర్ణయించింది.

ఈ ప్రత్యేక ఆర్డర్‌ను మహారాష్ట్రలోని కొల్హాపూర్‌కు చెందిన ప్రసిద్ధ కళాకారుడు విక్రాంత్ మాలికి అప్పగించారు. గత ఇరవై ఏళ్లుగా వెండితో వివిధ కళాఖండాలు తయారు చేస్తున్న ఆయనకు ఇది పూర్తిగా కొత్త అనుభవంగా మారింది. ఎందుకంటే ఇంతకుముందు ఆయన ఎప్పుడూ వెండితో చెప్పులు తయారు చేయలేదు. అయినప్పటికీ దీనిని సవాల్‌గా స్వీకరించి ఎంతో శ్రద్ధతో పని ప్రారంభించారు.

ఈ చెప్పుల తయారీ కోసం 95 శాతం స్వచ్ఛత కలిగిన సుమారు 1.5 కిలోల వెండిని ఉపయోగించారు. ప్రస్తుతం వెండి ధరలు భారీగా పెరిగిన నేపథ్యంలో ఈ ప్రాజెక్ట్ ఖర్చు మరింత ఎక్కువైంది. మొదట ఒక సంప్రదాయ లెదర్ కొల్హాపురి చెప్పును తీసుకుని దాని డిజైన్‌ను పూర్తిగా అధ్యయనం చేశారు. తరువాత అదే నమూనాలో వెండితో ఒక్కో భాగాన్ని ప్రత్యేకంగా తయారు చేశారు.

సాధారణంగా వెండి మృదువుగా ఉండటం వల్ల నేరుగా ధరించేందుకు అనుకూలం కాదు. అందుకే ఈ చెప్పులను ఉపయోగించడానికి బలంగా ఉండేలా వెండిలో కాడ్మియంను మిక్స్ చేసి దృఢత్వం పెంచారు. బొటనవేలు పట్టే భాగం, సోల్, వేణి, పట్టీలు వంటి అన్ని భాగాలను విడివిడిగా తయారు చేసి తరువాత వాటిని జాగ్రత్తగా అనుసంధానించారు.

ఈ అద్భుతమైన కళాఖండాన్ని పూర్తి చేయడానికి విక్రాంత్ మాలి దాదాపు తొమ్మిది రోజుల పాటు రాత్రింబవళ్లు శ్రమించారు. చెప్పుల తయారీకి ఆయన రూ.22 వేల వరకు మేకింగ్ ఛార్జీలు తీసుకున్నట్లు తెలిసింది. గతంలో ఆయన ఛత్రపతి శివాజీ మహారాజ్ ఉపయోగించిన వస్తువుల నమూనాలు, వెండి బ్యాట్లు, ఖడ్గాలు వంటి అనేక ప్రత్యేక వస్తువులు రూపొందించినప్పటికీ, ఈ వెండి కొల్హాపురి చెప్పులు తన కెరీర్‌లో అత్యంత ప్రత్యేకమైనవని ఆయన తెలిపారు.

ప్రస్తుతం ఈ వెండి చెప్పుల ఫొటోలు సోషల్ మీడియాలో విపరీతంగా వైరల్ అవుతున్నాయి. కొందరు ఈ కానుకను ప్రేమకు ప్రతీకగా అభివర్ణిస్తుండగా, మరికొందరు ఇంత ఖరీదైన చెప్పులు ధరించడానికి ఎలా ఉపయోగిస్తారో అంటూ ఆశ్చర్యం వ్యక్తం చేస్తున్నారు. ఏదేమైనా, అల్లుడిపై ప్రేమను వినూత్నంగా వ్యక్తపరిచిన ఈ ఘటన ఇప్పుడు దేశవ్యాప్తంగా చర్చనీయాంశంగా మారింది.